Urdu Poetry, Love Shayari, Sad Poetry & Islamic Poetry

Muhabbat Ik Samandar ha

Muhabbat ik Samandar hai


محبت اِک سمندر ہے ، ذِرا سے دِل کے اَندر ہے

ذِرا سے دِل کے اَندر ہے مگر پورا سمندر ہے


محبت رات کی رانی کا ، ہلکا سرد جھونکا ہے

محبت تتلیوں کا ، گُل کو چھُو لینے کا منظر ہے


محبت باغباں کے ہاتھ کی مِٹّی کو کہتے ہیں

رُخِ گُل کے مطابق خاک یہ سونے سے بہتر ہے


جہانِ نو ، جسے محبوب کی آنکھوں کا حاصل ہو

فقیہہِ عشق کے فتوے کی رُو سے وُہ سکندر ہے


نہیں ترتیبِ آب و خاک و باد و آگ سے جیون

ظَہُورِ زِندگانی کو ، محبت اَصل عُنصر ہے


کوئی دُنیا میں نہ بھی ہو ، پہنچ میں ہے محبت کی

بدن سے ماوَرائی ہے ، محبت رُوح پرور ہے


محبت ہے رَمی شک پر ، محبت طوفِ محبوبی

صفا ، مروہ نے سمجھایا ، محبت حجِ اَکبر ہے


محبت جوئے شیرِ کُن ، محبت سلسبیلِ حق

محبت اَبرِ رَحمت ہے ، محبت حوضِ کوثر ہے


اَگر تم لوٹنا چاہو ، سفینہ اِس کو کر لینا

اَگر تم ڈُوبنا چاہو ، محبت اِک سمندر ہے


سنو شہزاد قیس آخر ، سبھی کچھ مٹنے والا ہے

مگر اِک ذات جو مشکِ محبت سے معطر ہے

Share

Leave a Reply

Your email address will not be published. Required fields are marked *

PoetrySad © 2018 Privacy Policy Disclaimer
Scroll Up