Urdu Poetry, Love Shayari, Sad Poetry & Islamic Poetry

Jaa Ma Sabaq Ishq Da Parhya

Jaa Ma Sabaq Ishq Da Parhya


جاں میں سبق عشق دا پڑھیا

مسجد کولوں جیوڑا ڈریا
ڈیرے جا ٹھاکر دے وڑیا


جتھے وجدے ناد ہَزار

عشق دی نوّیوں نوّیں بہار


جاں میں رَمز عشق دی پائی

مَینا طوطا مار گوائی
اندر باہر ہوئی صفائی


جِت وَل ویکھاں یارو یار

عشق دی نوّیوں نوّیں بہار


ہیر رانجھے دے ہو گئے میلے

بھُلّی مہر ڈھوڈیندی بیلے
رانجھا یار بُکّل وِچ کھیلے


مینوں سدھ رہی نہ سار

عشق دی نوّیوں نوّیں بہار


وید قرآناں پڑھ پڑھ تھکے

سجدے کردیاں گھس گئے متھے
نہ رب تیرتھ نہ رب مکّے


جس پایا تس نور اَنوار

عشق دی نوّیوں نوّیں بہار


پُھوک مصلّٰی بھن سٹ لوٹا

نہ پھڑ تسبیح عاصا سوٹا
عاشق کیہندے دے دے ہوکا


ترک حلالوں کھا مردار

عشق دی نوّیوں نوّیں بہار


عمر گوائی وچ مسیتی

اندر بھریا نال پلیتی


کدے نماز توحید نہ نیتی


ہن کی کرنائیں شور پُکار

عشق دی نوّیوں نوّیں بہار


عشق بُھلایا سجدہ تیرا

ہن کیوں اینویں پاویں جھیڑا
بلھا ہوندا چپ بتیرا


عشق کریندا مارو مار

عشق دی نوّیوں نوّیں بہار

 

Read More: Allama Iqbal Poetry

Share

Leave a Reply

Your email address will not be published. Required fields are marked *

PoetrySad © 2018 Privacy Policy Disclaimer
Scroll Up